COLLYRIDIANI

COLLYRIDIANI

a Graeca voce Κολλυρίδες, quae libi quoddam genus notat, dicti, qui B. Virgini, tamquam Deae, istiusmodi liba offerebant, cultu a feminis peractô, in Arabia. Epiphan. Haer. 78. 79. Baron. A. C. 373. n. 30. Nempe eôdem tempore, quô in Arabia Antidicomarianitae orti sunt, qui Mariae Virginitati usque eo contradixerunt, ut assererent, eam, post natum Dominum, liberos ex marito suscepisse; vicissim alii surrexêre, in eadem provincia, qui B. Virginem divinis honoribus afficiendam esse, statuerent. De illis inter alia Epiphanius, Haeres. 69. §. 1. Quaedam, inquit, mulieres currum quendam sive cellam quadratam ornantes, expassô super ipsum linteô in die quodam illustri anni, per aliquot dies, panem propanunt et offerunt in nomen Mariae. Omnes autem de pane participant etc. Plura apud Io. Forbesium, Instruction. Historico-Theologic. l. 4. c. 8. §. 4.